Kaixo, Ainhoa Arruti Uria naiz eta Hariak proiektuaren atzean nago. Osasun-gaikuntza duen psikologoa naiz, eta atxikimenduaren eta traumaren perspektibak oinarri izanda lan egiten dut ikuspegi integratibo batetik.

Azken urteotan, nire ikasketak direla eta, asko bidaiatzeko aukera izan dut eta horri esker, herrialde ezberdinetan lan egiteko aukera izan dut eta errealitate ezberdinak gertutik ezagutu ditut. Gainera, lanaz gain familia bihurtu diren lagunak egin ditut eta beraien familiekin denbora pasa izanak izugarri aberastu du nire munduari begiratzeko modua. 

Nire jaioterritik irteteak eta esperientzia horiek edukitzeak aukera eman dit nire mundu-ikuspegia zabaltzeko eta ulertzeko pertsona bakoitzak bere errealitatea modu bakarrean bizi duela eta beharrezkoa dela lehenik modu indibidual horiek ulertzea, ondoren laguntzeko. 

Hirugarren belaunaldiko terapien masterra egin ondoren, atxikimenduaren garrantzia eta traumaren eragina ezagutu nituen. Traumaren eta atxikimenduaren ikuspegitik aztertzeak nire kulturaren barruko errealitate desberdinak ulertzen ere lagundu dit. Horrek psikologo sanitario gisa prestatzera bultzatu ninduen. 

Gainera, neure lan terapeutikoan nago eta hau funtsezkoa iruditzen zait nire zailtasun propioek, kontsultara datozen pertsonen prozesu terapeutikoa oztopa ez dezaten. 

Oso gertuko pertsona naiz baina asko errespetatzen ditut bakoitzak jartzen dituen mugak eta behar dituen denborak. Terapiaren erritmoa paziente bakoitzak jartzen du.

Bestalde, etenik gabeko formakuntza funtsezkoa da niretzat eta zailtasunen azalpen ez erredukzionista batek interbentzio plan osoago bat eskaintzen duela sinesten dut.